Аҳмедов "Анжи"да қоладими ва Озоданинг жанжалга айланаёзган концерти
Ундаги ўзбек тилидаги хабарларни uz.ca-news.orgда ўқиш мумкин. Веб-сайт ўз хабарлари билан бирга бошқа манбалардан олинган янгилик ва мақолаларни ҳам бериб туради. Жумладан, мазкур веб-сайтда Би-би-сидан олинган хабарларни ҳам ўқиш мумкин.
Одил Аҳмедов "Анжи"дан кетадими?
Ҳозир футбол оламида шов-шувга айланган хабарлардан бири Россиянинг пулдор "Анжи" командасида юз берган сўнгги воқеалардир.
uz.ca-news.orgдаги хабарлардан бири "Одил Аҳмедов:Маошим камайтирилишига розиман" дея сарлавҳаланган.
"Анжи" клуби ярим ҳимоячиси Одил Аҳмедов жамоада қолишини маълум қилди. Ўзбекистон терма жамоаси ярим ҳимоячиси бунинг учун маоши камайтирилишига ҳам рози эканини айтиб ўтган. Вебсаҳифа Одил Аҳмедовнинг матбуотга берган қуйидаги суҳбатини келтирган:
- Ҳа. Ҳозирча қоламан.
- Бироз вақт олдин сизнинг "Арсенал"га ўтишингиз ҳақида хабарлар пайдо бўлган эди.
- Ҳозирча бошқа клублардан таклиф бўлгани ҳақида ҳеч нарса эшитганимча йўқ.
-"Анжи"даги маошингиз камайтирилишига тайёрмисиз?
- Бу ўринда нима ҳам қилиш мумкин? Албатта, тайёрман".
Мазкур хабарни тайёрлашда веб-сайт Анонс.узга таянган.
Бундан сал олдинроқ эса веб-сайтда Одил Аҳмедовнинг 6 миллион евро эвазига "Арсенал"га ўтиши мумкинлиги борасида хабар берилганди.
'Ўзбек тилидами, демак, Қўйлиқ-Бешёғочда ишлаб чиқарилган'
Ушбу вебсаҳифада "Матбуот шарҳлари" рукни остида берилган "Ўзбекистонда нархларнинг ошиши пасаймаяпти" сарлавҳали шарҳ аслида Uznews.netдан олинганлиги кўрсатилган.
"Молларнинг ўзбек тилида маркаланиши ҳақидаги янги талаблар нархларнинг ошишига олиб келди", деб ёзилади ушбу шарҳда. 1 июлдан Ўзбекистонга мол импорт қилувчилар учун янги талаблар кучга кирди - булар президентнинг маҳаллий маҳсулотларнинг рақобатбардошлигини ошириш ва ноқонуний мол киритилишига қарши курашни кучайтириш чоралари ҳақидаги қарорига мувофиқ, завод маркаларининг ўзбек тилида бўлишидир.
Июль ўрталарига келиб импорт ширкатлари омборларида ва дўконлардаги эски - 1 июлгача келтирилган, ўзбек тилида ёрлиғи бўлмаган моллар захираси деярли тугади. Камёблик эса нархлар ошишини қўзғади.
Хорижий ишлаб чиқарувчилар билан молларнинг Ўзбекистон давлат тилида маркалашга келишиш ҳақида импортерлар шу йилнинг январи охирларида, қарор қабул қилинган пайтда билишган эди.
Маълум бўлишича ўзбек тилида қадоқланган молларнинг кечикишига сабаб, қадоқ дизайнидаги ёзувларни ўзбек тилида ёзишни истамаган ишлаб чиқарувчилар эмас, беш ойдан бери етказиб берувчилар билан келишолмаётган маҳаллий импортерларнинг имиллаши ҳам эмас экан. Россиядан озиқ-овқат моллари импорти билан шуғулланувчи ширкат вакилининг айтишича, импортерлар келтириладиган молларнинг завод маркировкасини ўзбек тилида таъминлаш учун муддатни атай чўзишган.
"Бизнинг харидоримиз психологияси шундайки, агар фабрика қадоғи ўзбек тилида ёзилган бўлса, у бу маҳсулот Қўйлиқ-Бешёғоч қўшма корхонасида қадоқланган дея ўйлайди", - дейди у. Ўзбекистондаги харидорлар нимагадир, ҳориждаги ишлаб чиқарувчилар ўз молларини ўзбек тилида маркалашлари мумкинлигига ишонгилари келмайди.
Маҳаллий харидор руҳиятидаги шу ҳусусиятдан келиб чиқиб, божхонада президент қарорининг бузилишига кўз юмишади деган умидда, кўплаб импорт ширкатлари ўзбек тилида қадоқлашни буюртма қилишга шошилишмади. Импортерларнинг умиди ўзини оқламади, энди эса улар "қонуний" қадоқланишни буюртиришга мажбур бўлишмоқда. Улардан айримларининг ишонтиришича, ўзбек тилида қадоқланган молларнинг биринчи партияси тахминан бир ойдан кейин Ўзбекистон дўкон ва бозорларига чиқарилиши мумкин.
Камёблик бартараф қилиниши билан, нархлар тушади, дея бир овоздан тасдиқлашмоқда тошкентлик импорт ширкатлари ва тижоратчилар. Улар янги маркировка талаблари нархларда акс этмайди дея ишонтиришмоқда. Ўзбекистон президенти ва ҳукуматининг "аксилимпорт" қарори аллақачон нархларнинг кўтарилишига сабаб бўлди. Президент қароридан бир ой ўтиб, Вазирлар Маҳкамаси импортни мураккаблаштирувчи янги қарор чиқарди. Ушбу ҳужжат махсус назорат идентификация белгилари маркала-надиган моллар рўйхатини кенгайтирди.
Кенгайтирилган рўйхатга, жумладан уяли телефонлар, автомобил газбаллон ускуналари, теле ва видеотехникалар киритилди. "Бу маиший техника нархларида акс этди, мартнинг иккинчи ярмидан бошлаб, уларнинг нархи ўртача 10%га ошди", дея ёзилган uz.ca-news.org веб-сайтида.
"Olam.uz" маиший техникага янги солиқлар ҳақида
Яқинда ўз фаолиятини бир неча ойлик танаффусдан сўнг қайта бошлаган "Olam.uz" 1 августдан бошлаб хориждан импорт қилинган маиший техниканинг бир қатор турларига нисбатан солиқларнинг янги тури киритилгани ҳақида хабар берган.
Янги солиқлар хусусан телевизорлар, CD ва DVD плейерларга таалуқлидир.
Хусусан телевизорларга экран катталигидан келиб чиққан ҳолда, 30% солиқ белгиланган.
Авваллари тевизор экрани назарга тутилмаган ҳолда, умумий тарзда 60% солиқ тартиби жорий бўлганди.
"Olam.uz" да айтилишича, охирги бир неча йил мобайнида Ўзбекистон ҳукумати ички ишлаб чиқаришни ҳимоялаш мақсадида қатор маиший техника турларига турфахиллашган солиқлар ва акцизларни киритиб келмоқда.
'Рақсга тушаётган Ўзбекистон ва жанжалга айланаёзган Озоданинг концерти'
Яна "ca-news.org" веб-сайтда санъат ва спортга оид хабарларга кўп жой ажратилади.
"Шарқ тароналари" фестивалига тайёргарлик қизғин кетяпти" - сарлавҳаси остидан берилган мақола ана шундай хабарлардан бири.
Бу хабарда ёзилишича 25-30 август кунлари Самарқандда бўлиб ўтадиган "Шарқ тарона-лари" IX халқаро мусиқа фестивалига тайёргарлик қизғин олиб борилмоқда.
"Айниқса, фестивалнинг очилиш маросими ранг-баранг ва эътиборга молик бўлиши кутилмоқда. Концерт дастурига Фарғона, Навоий, Самарқанд вилоятлари ҳамда Тошкент давлат миллий рақс ва хореография олий мактабидан тўрт юзга яқин раққоса таклиф этилган. Репертуардан халқ рақслари, фольклор, тўй маросими қўшиқ ва рақслари жой олади. Концерт дастурига Ўзбекистон халқ артисти Баҳодир Йўлдошев режиссёрлик қилмоқда", дейилган uz.ca-news.org хабарида.
Санъатга оид иккинчи бир хабар эса, "Озоданинг Пензадаги концерти жанжалга айланиб кетишига бир баҳя қолди", дея сарлавҳаланган.
Хабарда айтилишича, Россиянинг Пенза шаҳридаги "Молодежный" залига тўпланган мухлислар концерт бошланишини нақ 2,5 соат кутиш-ларига тўғри келди.
Зал тўлиб-тошган бўлса-да, чипта сотувидан кутилган тушум тушмаган: 300 минг рублнинг ўрнига 100 минг рублдан сал кўпроқ пул йиғилган.
Сабаби оддий: айрим "мухлислар" чипта сотиб олишни "унутишган" экан.
Кутишдан чарчаган баъзи томошабинлар чипталарини қайтариб ҳам беришган. Мухлислар орасида ёш боласи билан келганлар ҳам бор эди. Кимдир бақирди, кимдир ҳуштак чалди, кимдир саҳна ортига ўтиб текшириб ҳам келди.
Ниҳоят, соат 19:00 га мўлжалланган консерт соат 21:30 да бошланган. Саҳнага чиққан Озода Нурсаидова мухлислардан узр сўраб, интиқиб кутилган қўшиқларни куйлаган.
Консерт бошлангандан кейин хам қўриқчилар чиптасиз қўшиқ тингламоқчи бўлган томошабинларни аниқлаб, залдан чиқариш билан шуғулланишган".
Бу хабарни uz.ca-news.org веб-сайти Вести.уз.га таяниб берган.
Ҳалок бўлган "Пахтакор" учун ёдгорлик
Веб-сайтда берилган яна бир хабарни фақат футбол мухлислари эмас, бошкалар ҳам қизиқиб ўқишлари мумкин.
"Тошкентдаги Боткин номидаги қабристонда 1979 йилда фожиали тарзда ҳалок бўлган "Пахтакор" жамоаси хотирасига бағишлаб ёдгорлик ўрнатилди. Ёдгорликнинг очилиш маросими 11 август куни бўлиб ўтади.
6 август куни 1979 йилги авиаҳалокатда ҳаётдан кўз юмган "Пахтакор" жамоаси аъзолари хотирасига бағишлаб ҳар йили анъанавий тарзда ўтказиладиган "Хотира қанотлари" турнири старт олди.
Мазкур турнирда Туркманистон, Қозоғистон каби қўшни мамлакатлардан ташриф буюрган 1998-99 йилларда туғилган ўсмир футболчилар иштирок этмоқда. Турнирда жами 16 та жамоа 4 гуруҳга бўлинган ҳолда қатнаша бошлади.
1979 йилнинг 11 август куни Днепродзержинск осмонида иккита Ту-134А йўловчи самолёти тўқнашиб кетганди. Тошкент - Минск йўналишида парвоз қилаётган самолёт бортида 84 киши, жумладан, 17 нафар пахтакорчи бор эди.
Челябинск - Воронеж - Кишинёв йўналишида кетаётган иккинчи самолётда эса 88 йўловчи ва 6 нафар экипаж аъзоси бўлган. Авиатўқнашувга сабаб бўлган хатога йўл қўйган диспетчерлар 15 йилдан озодликдан маҳрум этилган".